ഉറുമ്പുകൾ

കുഞ്ഞനുറുമ്പുകൾ
ചിന്തകൾ
തല ചുമടായി
കൊണ്ടു വന്നു.
വരി വെച്ച്
നടന്ന് കയറി
അവർ തലയ്ക്കുള്ളിൽ
താമസമാക്കി.
പാഴ് ചിന്തകൾ
അകം നിറയെ വിതറി
ഇരുട്ടിന്റെ വിത്ത് വിതച്ചു.
തല മുഴുവൻ അരിച്ചു നടന്ന അവർ ഓർമ്മകൾ
ചികഞ്ഞെടുത്തു.
ഉറുമ്പുകൾ കാർന്നു തിന്ന ഓർമ്മകൾക്കെല്ലാം
മധുരമുണ്ടായിരുന്നു
കയ്പ്പേറിയ ഓർമ്മകൾ
അവർ അവിടെ തന്നെ ഉപേക്ഷിച്ചു.
തെളിച്ചമുള്ളവയെല്ലാം കവർന്നെടുത്ത്
അവർ അടുത്ത ഇടം
തേടി യാത്രയായി
തലയിൽ നിന്ന്
ഊറി വന്ന
കയ്പ്പ് നീര് കുടിച്ചു
ഞാൻ പതിയെ
മറവിയുടെ ലോകത്തേക്ക്
നടന്നു കയറി.

***