കുരീപ്പുഴയുടെ നഗ്നകവിതകള്‍

ഏതു നദിയും ഗംഗയല്ല

വാഴ്ത്തിപ്പാടാന്‍
മഹാകവികളില്ല
പൂജിക്കാന്‍
പൂണൂലന്മാരില്ല.
സഞ്ചാരപഥവും
ചരിത്രവും ശേഖരിക്കാന്‍
മൂവി ക്യാമറ വന്നില്ല.

എങ്കിലും, ദിവസേന
പാതിവെന്ത ശവങ്ങള്‍
ഈ നദിയിലൂടെ
ഒഴുകുന്നില്ല.

വിശുദ്ധേ,
നീ ഗംഗയല്ല.

***

കൂറ്

ഒന്നാം സാക്ഷി മുതല്‍
നൂറാം സാക്ഷി വരെ
പ്രതിഭാഗത്തേക്ക് കൂറുമാറി.

വാദിയും മാറി
ഇനി മാര്‍ഗ്ഗമില്ലല്ലോ

ഏതോ പഴുതുപയോഗിച്ച്
കോടതിയും മാറി

അടുത്തരംഗം
ജനകീയക്കോടതി.

അതാ,
ഗായകസംഘം
പ്രവേശിച്ചുകഴിഞ്ഞു.
അശകൊശലേ മാറുന്നോ
ഈ കൂറെങ്ങാനും മാറുന്നോ?

***

ഫോട്ടോഷോപ്പ്

കുയിലിന്റെ ചിറകില്‍
കഴുകന്റെ തൂവല്‍
അയ്യങ്കാളിയുടെ കയ്യില്‍
ഭഗവദ് ഗീത
നാരായണഗുരുവിന്
കാവിവസ്ത്രം.

ചരിത്രം തോറ്റു
ഫോട്ടോഷോപ്പ് ജയിച്ചു.

***

ചിയേഴ്‌സ്

പുസ്തകപ്പുഴു
മതഗ്രന്ഥങ്ങള്‍ തിന്ന്
തടിച്ചുകൊഴുത്തു.

പുഴുവിന്റെ
വിശപ്പ് മാറിയതില്‍
ദൈവങ്ങള്‍ ദുഃഖിച്ചു.

പിന്നെ,
പുഴുവിനെ ഫ്രൈ ചെയ്ത്
പുഴുച്ചെരുപ്പിന്റെ
വാറഴിക്കാനുള്ള
യോഗ്യതയില്ലെന്നോര്‍ത്ത്
ഗ്ലാസ്സുകളുയര്‍ത്തി
ചിയേഴ്‌സ്!

***