പരിചിതമല്ലാത്ത സ്വപ്നത്തിൽ ഒരാൾ

പരിചിതമല്ലാത്ത
ഒരു സ്വപ്നം
കാണുന്നുവെന്നു കരുതുക
അവിടെ നിങ്ങളുപേക്ഷിച്ച
അനേകം പൂച്ചകളുണ്ടെന്നും

കാലെടുത്ത് വക്കുന്നതേ
അവ കരഞ്ഞു വിളിച്ച്
നഗര കവാടം കടന്നെത്തുന്ന
പട്ടാളക്കാർക്ക് നിങ്ങളെ
ഒറ്റു കൊടുത്തേക്കാം

അവർ നിങ്ങൾ
കണ്ട സ്വപ്നങ്ങൾ
മുഴുവൻ തിരിച്ചെടുക്കുകയോ
അഴമേറിയ ഒരു കുഴിയിലെറിഞ്ഞ്
ഉണർത്തുകയോ ചെയ്യാം.

പരിചിതമല്ലാത്ത ഒരു സ്വപ്നത്തിൽ
നിങ്ങളെ കാത്തിരിക്കുന്നത്
പഴയ ഒരു പ്രണയമാണെന്ന് കരുതുക

അത് ഒരു ദീർഘമായ
നടത്തയുടെ അവസാനത്തെ
ചുവടുപോലെ മെലിഞ്ഞതാവാം

നിങ്ങളില്ലാതിരുന്നപ്പോൾ
പതുങ്ങിയെത്തി ചുറ്റിക്കയറിയ
പ്രണയം പോലെന്തോ കൊണ്ട്
ശ്വാസം മുട്ടുന്നതാവാം

ഇപ്പോൾ തുറന്നു കിട്ടിയ
ജനലുകളുടെ സ്വാതന്ത്ര്യത്തിൽ
ആഹ്ലാദിക്കുന്നതുമാവാം

പക്ഷേ അതൊരിക്കലും
നിങ്ങളെ ഒറ്റുകൊടുക്കില്ല
ഉണർത്തുകയില്ല

അതിന്റെ ആഴംകൊണ്ട്
കൊല്ലാതെ കൊല്ലുകയേ ഉള്ളൂ.

***

കവിപരിചയം :

ജുനൈദ് റഹ്മാൻ

മലയാളത്തിലും ഇംഗ്ലീഷിലും കവിതകൾ എഴുതുന്നു. കവിതകൾ, കുറിപ്പുകൾ, ഫോട്ടോഗ്രാഫുകൾ തുടങ്ങിയവ ഭാഷാപോഷിണി, ഇന്ത്യൻ ലിറ്ററേച്ചർ തുടങ്ങിയ സാഹിത്യ പ്രസിദ്ധീകരണങ്ങളിലും നിരവധി ഓൺലൈൻ ജേർണലുകളിലും പ്രസിദ്ധീകരിച്ചിട്ടുണ്ട്. ഇംഗ്ലീഷ് കവിതകൾ Indo Australian Anthology of Contemporary Poetry, Acerbic Anthology, How to Translate an Earthworm തുടങ്ങിയ സമാഹാരങ്ങളിലും ഉൾപ്പെടുത്തിയിട്ടുണ്ട്. നിരവധി ഹ്രസ്വചിത്രങ്ങൾക്കും സബ്ടൈറ്റിലുകൾ തയ്യാറാക്കിയിട്ടുണ്ട്.