പ്രശസ്ത എഴുത്തുകാരനും മുതിര്ന്ന മാധ്യമ പ്രവര്ത്തകനും ലോകയാത്രികനുമായ അനില്കുമാര് എ.വി.യുടെ തിങ്കള് പംക്തി തുടരുന്നു…
നുറുങ്ങുകള് 16
1989- ല് ഏക പാര്ടി രാഷ്ട്രത്തില്നിന്ന് ബഹുകക്ഷി ലിബറല്- ജനാധിപത്യലേക്കുള്ള സമാധാനപരമായ മാറ്റത്തിലൂടെയാണ് ഹംഗേറിയന് പീപ്പിള്സ് റിപ്പബ്ലിക്കിലെ കമ്യൂണിസ്റ്റ് ഭരണത്തിന് അന്ത്യമായത്. 1956- ലെ വിപ്ലവം സോവിയറ്റ് യൂണിയനാല് അടിച്ചമര്ത്തപ്പെട്ടശേഷം മാര്ക്സിസ്റ്റ്-ലെനിനിസ്റ്റ് രാഷ്ട്രമായി. 1980-കളുടെ അവസാനം സോവിയറ്റ് യൂണിയന് ദുര്ബലമായപ്പോള് കിഴക്കന് ബ്ലോക്ക് ശിഥിലമായിത്തീര്ന്നു. 1989- ലെ വട്ടമേശ ചര്ച്ചകള്ക്ക് ദശാബ്ദങ്ങള്ക്ക് മുമ്പ് രാഷ്ട്രീയ, സാമ്പത്തിക ശക്തികള് ഭരണകക്ഷിയായ ഹംഗേറിയന് വര്ക്കിങ് പീപ്പിള്സ് പാര്ടിയില് (എംഎസ്ഇസെഡ്എംപി) സമ്മര്ദ്ദം ചെലുത്തിയതാണ് കമ്യൂണിസത്തിന്റെ പതനത്തിന്റെ ആദ്യ കാരണം. 1950-കളിലെയും 60-കളിലെയും വിപ്ലവങ്ങളുടെ തരംഗത്തിനുശേഷം കിഴക്കന് യൂറോപ്പില് നടപ്പാക്കിയ ന്യൂ ഇക്കണോമിക് മെക്കാനിസം ഹംഗേറിയന് കമ്യൂണിസത്തിന്റെ ഏറ്റവും ദുര്ബലമായ ഘടകമായി മാറി, ജനാധിപത്യത്തിലേക്കുള്ള പരിവര്ത്തനത്തിന് ഏറെ സംഭാവന നല്കിയ വസ്തുത. 1980-കളോടെ ഹംഗറി പണപ്പെരുപ്പത്താല് കഷ്ടപ്പെടാന് തുടങ്ങി, പ്രത്യേകിച്ച് സ്ഥിര വരുമാനക്കാരെ കാര്യമായി ബാധിച്ചു. വന്തോതിലുള്ള വിദേശ കടബാധ്യതയിലും ദാരിദ്ര്യത്തിലും വിലക്കയറ്റത്തിലും പൊറുതിമുട്ടി. 1985 ആയപ്പോഴേക്കും സാമ്പത്തിക ചാഞ്ചാട്ടത്തിനൊപ്പം രാഷ്ട്രീയ അസ്ഥിരതയും തലപൊക്കിയതോടെ കമ്യൂണിസത്തിന്റെ ആസന്ന തകര്ച്ച തിരിച്ചറിയാന് ഭരണകൂടം നിര്ബന്ധിതമായി.
ട്രംപ് പ്രോത്സാഹിപ്പിച്ച ആഗോള ദേശീയവാദ പുനരുജ്ജീവനം
1989-ല് കമ്യൂണിസത്തിന്റെ പതനത്തിനു ശേഷം ഏറ്റവും ഉയര്ന്ന പോളിങ് ശതമാനം (77%) രേഖപ്പെടുത്തപ്പെട്ട 2026 ഏപ്രില് 12 ന്റെ ഹംഗറിയന് തെരഞ്ഞെടുപ്പില് സ്വന്തം പൗരന്മാരുടെ ഏറിവരുന്ന അസംതൃപ്തി മറികടക്കാന് കഴിയാതിരുന്ന വലതുപക്ഷ പ്രധാനമന്ത്രി വിക്ടര് ഓര്ബന് കനത്ത തിരിച്ചടിയേറ്റു. അമേരിക്കയിലെ മാഗ സാംസ്കാരിക യോദ്ധാക്കള്ക്കും ആഗോള വലതുപക്ഷ പോപ്പുലിസ്റ്റുകള്ക്കും പ്രചോദനമായ അദ്ദേഹത്തിന്റെ പതനം അമേരിക്കന് പ്രസിഡന്റ് ഡൊണാള്ഡ് ട്രംപ് പ്രോത്സാഹിപ്പിച്ച ആഗോള ദേശീയവാദ പുനരുജ്ജീവനത്തിന്റെ ആക്കം തകര്ത്തതുമാണ്. ബുഡാപെസ്റ്റിലെ വിടവാങ്ങല് പ്രസംഗത്തില് പ്രതിപക്ഷത്തെ അഭിനന്ദിച്ച ഓര്ബന് ഭരിക്കാനുള്ള ഉത്തരവാദിത്തവും അവസരവും ഇത്തവണ ഞങ്ങള്ക്ക് ലഭിച്ചില്ല, പോരാട്ടം അവസാനിച്ചിട്ടില്ലെന്നും ഒരിക്കലും ഒരിക്കലും ഒരിക്കലും വിട്ടുകൊടുക്കില്ലെന്നും അനുയായികളെ ഓര്മിപ്പിച്ചു. ഫലം പുറത്തുവന്നയുടന് അദ്ദേഹത്തിന്റെ മുന് വിശ്വസ്തനും പ്രധാന പ്രതിപക്ഷ പാര്ടിയായ ടിസ്സ നേതാവുമായ പീറ്റര് മാഗ്യാര് സ്ഥാനമേറ്റു. പാര്ലമെന്റ് മന്ദിരത്തിന് മുന്നിലുള്ള ഡാന്യൂബ് നദീതീരത്ത് ബഹുഭൂരിപക്ഷം യുവാക്കള് അണിനിരന്ന വന് ജനാവലി ഹംഗേറിയന് പതാകകള് വീശിയും ആര്പ്പുവിളിച്ചും ആഹ്ലാദിച്ചു. നമ്മള് അത് ചെയ്തു, നമ്മള് ഹംഗറിയെ മോചിപ്പിച്ചു, രാജ്യം തിരിച്ചുപിടിച്ചു. യൂറോപ്യന് യൂണിയനിലെ വിമര്ശകര് ജനാധിപത്യ മാനദണ്ഡങ്ങള് അട്ടിമറിക്കുകയുണ്ടായി. ഒരു വ്യവസ്ഥയുടെ അര്ത്ഥവത്തായ പരിഷ്കാരങ്ങള്ക്ക് വാതില് തുറന്നു. തെരഞ്ഞെടുക്കപ്പെട്ടാല് യൂറോപ്യന് യൂണിയനുമായുള്ള ഹംഗറിയുടെ ബന്ധം മെച്ചമാക്കും. ഇതൊരു പങ്കിട്ട വിജയമാണെന്ന് എല്ലാ ഹംഗേറിയക്കാര്ക്കും അറിയാം. നമ്മുടെ മാതൃരാജ്യം തീരുമാനിച്ചു. അത് വീണ്ടും ജീവിക്കാന് ആഗ്രഹിക്കുന്നു. അത് ഒരു യൂറോപ്യന് രാജ്യമാകാന് ആഗ്രഹിക്കുന്നുവെന്നായിരുന്നു വിജയ പ്രസംഗത്തിനിടെ മഗ്യാര് ആവേശഭരിതനായത്.
ലിബറല് ജനാധിപത്യത്തിന്റെ സുഹൃത്തുക്കളും ശത്രുക്കളും തമ്മിലെ പോരാട്ടമായി വ്യാപകമായി വിലയിരുത്തപ്പെട്ട വോട്ടെടുപ്പില് അമേരിക്ക, യൂറോപ്പ്, ലാറ്റിന് അമേരിക്ക എന്നിവിടങ്ങളിലെ ആരാധകരുടെ കൈയടിക്കായി ഓര്ബന് നിലകൊണ്ടു. അദ്ദേഹത്തിന്റെ ജയം കൊതിച്ച വാഷിങ്ടണ് മത്സരം സസൂക്ഷ്മം നിരീക്ഷിക്കുകയും പ്രചാരണങ്ങളെ പിന്തുണയ്ക്കുകയും ചെയ്തു. തെരഞ്ഞെടുപ്പ് പ്രചാരണത്തിന്റെ അവസാന ഘട്ടത്തില് വൈസ് പ്രസിഡന്റ് ജെ ഡി വാന്സിനെ ട്രംപ് ഹംഗറിയിലേക്ക് അയച്ചിരുന്നു. അതിനാല് ഫലത്തിന്റെ പ്രത്യാഘാതങ്ങള് ഹംഗറിയുടെ അതിര്ത്തികള്ക്കപ്പുറത്തേക്ക് വ്യാപിക്കും. തെരഞ്ഞെടുപ്പ് വിജയങ്ങളെ സ്ഥാപിതമായ രാഷ്ട്രീയ നിയന്ത്രണമാക്കി മാറ്റുന്നതിനുള്ള മാതൃകയായി ഓര്ബനിസത്തെ കണ്ടിരുന്ന മറ്റ് വലതുപക്ഷ പോപ്പുലിസ്റ്റുകള്ക്കും ആ വീഴ്ച ഒരു നഷ്ടമായിരിക്കുന്നു.
മുന് നാല് തെരഞ്ഞെടുപ്പുകളിലും ഭരണംപിടിച്ചത് അനായാസേന
നാല് മുന് തെരഞ്ഞെടുപ്പുകളിലും അനായാസേന ഭരണം പിടിച്ച ഓര്ബന്റെ ഫിഡെസ് പാര്ടിയുടെ പരാജയത്തിന്റെ വേഗതയും ആഴവും പലരെയും അമ്പരപ്പിച്ചു. യൂറോപ്പിലും അമേരിക്കയിലുടനീളവുമുള്ള യാഥാസ്ഥിതികര് ആ അറുപത്തിരണ്ടുകാരനെ ലിബറല് മാതൃകയിലുള്ള ജനാധിപത്യത്തിന്റെ സൂത്രധാരനായി ആഘോഷിക്കുകയും കൊണ്ടുനടക്കുകയും ചെയ്തെങ്കിലും അധികാരത്തിലിരുന്ന കാലത്ത് അനിസ്ലാമിക ജനാധിപത്യത്തിന്റെ ആഗോള ഗുരുവായി മാറി. രോഗാതുരമായ രാഷ്ട്രീയ പരിസ്ഥിതി, സാമ്പത്തിക സ്തംഭനാവസ്ഥ, ഭരണതലത്തിലെ കൊടിയ അഴിമതി, അന്താരാഷ്ട്ര ഒറ്റപ്പെടല്, പ്രഭുക്കന്മാരുടെ സമ്പത്ത് കുന്നുകൂടല് എന്നിവയില് മടുത്ത വോട്ടര്മാര് കൈവിട്ടു. ആ സംവിധാനത്തിന് വലിയ സാമ്പത്തിക വില നല്കേണ്ടിയുംവന്നു. സര്ക്കാര് കരാറുകള് കമ്പനികള്ക്ക് ലഭിച്ചത് കഴിവുകളുടെയോ സാമ്പത്തിക കാര്യക്ഷമതയുടെയോ അടിസ്ഥാനത്തിലല്ല, മറിച്ച് രാഷ്ട്രീയ വിശ്വസ്തതമാത്രം പരിഗണിച്ചാണ്. മറ്റൊരു വിധത്തില് പറഞ്ഞാല് അഴിമതിയും സ്വജനപക്ഷപാതവും ഓര്ബനിസത്തിന്റെ അവിഭാജ്യ ഘടകങ്ങളായിരുന്നു.
ജനപ്രിയ വിരോധാഭാസം എന്ന് വിളിക്കുന്ന സുസ്ഥാപിത മാതൃക
ആ മാതൃകയില് രാഷ്ട്രീയം സമ്പദ്വ്യവസ്ഥയെക്കാള് പ്രധാനമാണ് പോപ്പുലിസ്റ്റ് ഭരണകൂടങ്ങളെക്കുറിച്ച് വിപുലമായി എഴുതിയ രാഷ്ട്രീയ ശാസ്ത്രജ്ഞന് ഇവാന് ക്രാസ്റ്റേവ് പറഞ്ഞു. എല്ലാം നിയന്ത്രിക്കുക എന്നതാണ് ലക്ഷ്യം. അതിന്റെ ഫലമായി, സമ്പദ്വ്യവസ്ഥ വില നല്കുന്നു. 2022-ലെ ഓര്ബന്റെ അവസാന തെരഞ്ഞെടുപ്പ് വിജയത്തിനുശേഷം ഹംഗറിയുടെ സമ്പദ്വ്യവസ്ഥയ്ക്ക് സുവര്ണകാലം വാഗ്ദാനം ചെയ്തു. അങ്ങനെയല്ല സംഭവിച്ചത്. അധികാരമേറ്റശേഷം ഉല്പ്പാദന വളര്ച്ചയിലുണ്ടായ അവിശ്വസനീയമായ ഇടിവാണ് എന്റെ ശ്രദ്ധയില്പ്പെട്ട ഏറ്റവും വലിയ സ്ഥിതിവിവരക്കണക്ക്. സമാന ചിന്താഗതിക്കാരായ പ്രസ്ഥാനങ്ങള്ക്ക് വളരെക്കാലമായി മാതൃകയായി നിലനില്ക്കുന്ന ഓര്ബന്റെ ഹംഗറി നിയന്ത്രണമില്ലാത്ത എക്സിക്യൂട്ടീവിന്റെയും നിയമവാഴ്ചയുടെ വ്യവസ്ഥാപിതമായ തകര്ച്ചയുടെയും ഫലങ്ങളെക്കുറിച്ചുള്ള ഉദാഹരണം കൂടിയാണ്. ജനപ്രിയ വിരോധാഭാസം എന്ന് ചിലര് വിളിക്കുന്ന സുസ്ഥാപിത മാതൃക. ചില ജനപ്രിയ നേതാക്കള് ചതുപ്പുനിലം വറ്റിക്കാനും അഴിമതിക്കെതിരെ പോരാടാനുമുള്ള വാഗ്ദാനങ്ങള് നല്കി ജയിക്കുന്നു. പിന്നീട് അധികാരത്തില് വന്നാല് അഴിമതി തടയാന് സഹായിക്കുന്ന സ്ഥാപനങ്ങളെ വെട്ടിമുറിക്കുകയും അത് ഭരണം ഉറപ്പിക്കാന് ഉപയോഗിക്കുകയും ചെയ്യുന്നു.ഹംഗറിയിലും ഇത് സംഭവിച്ചു. കോടതികളെയും ഒരുകാലത്ത് സ്വതന്ത്രമായിരുന്ന സര്ക്കാര് ഏജന്സികളെയും വിശ്വസ്തരെ കൊണ്ട് നിറച്ചു. മാധ്യമ സ്ഥാപനങ്ങളുടെ നിയന്ത്രണം ഏറ്റെടുത്തു. 2014-ല് ഈ ഘടനയെ ലിബറല് ഭരണകൂടമെന്ന് നാമകരണം ചെയ്തു. ഒടുവില് അത് സമ്പദ്വ്യവസ്ഥയെ ബാധിച്ചു. ആ മാതൃക സ്വകാര്യ മേഖലയിലേക്ക് ആഴത്തില് വ്യാപിപ്പിക്കുകയും ചെയ്തു. ശക്തരായ സ്വതന്ത്ര സാമ്പത്തിക പ്രവര്ത്തകരുടെ ഉദയം തടയുക എന്നതായിരുന്നു അതിന്റെ അര്ഥം. – ബഹുരാഷ്ട്ര കുത്തകകള്ക്ക് പ്രാദേശിക കമ്പനികളെക്കാള് മുന്ഗണന നല്കി. വിശ്വസ്തരെ ശാക്തീകരിക്കുകയെന്നതായിരുന്നു അതിന്റെ ഊന്നല്. – ഓര്ബനോട് പ്രതിജ്ഞാബദ്ധമായ സ്ഥാപനങ്ങള്ക്ക് പൊതു ടെന്ഡറുകളില് വ്യക്തമായ ആനുകൂല്യം ലഭിച്ചു. അതില് സ്വന്തം കുടുംബത്തിന്റെ ഉടമസ്ഥതയിലുള്ളവയും ഉള്പ്പെടുന്നു. സര്ക്കാര് പിന്തുണയുള്ള ധനസഹായത്തില് കെട്ടിപ്പടുത്ത വിശാല സ്വകാര്യ ഇക്വിറ്റി, റിയല് എസ്റ്റേറ്റ് സാമ്രാജ്യത്തിന് നന്ദി, ആ കമ്പനികള് ചെലവ് കുറഞ്ഞവയല്ല, നല്ല സേവനങ്ങള് നല്കുന്നില്ല, ചെയ്യുന്ന കാര്യങ്ങളില് മിടുക്കരല്ല, – ഓര്ബനുമായി ഒത്തുപോകുന്നതില് മാത്രമാണ് അവര് മിടുക്കര്. പ്രധാനമന്ത്രിയുടെ മരുമകന് ഇസ്തവാന് ടിബോര്ക്സ് ഹംഗറിയിലെ ഏറ്റവും സമ്പന്ന ബിസിനസുകാരില് ഒരാളായി മാറി.
പിന്തുണക്കാര്ക്ക് പ്രതിഫലം നല്കാന് ഉപയോഗിച്ചത് നികുതിദായകരുടെ പണം
തന്നെ പിന്തുണച്ച വോട്ടര് ഗ്രൂപ്പുകള്ക്ക് പ്രതിഫലം നല്കുന്നതിന് ഓര്ബന് നികുതിദായകരുടെ പണം ഉപയോഗിച്ചു. ഊര്ജ വിലയ്ക്ക് സബ്സിഡി അനുവദിക്കുകയും പെന്ഷന് വര്ധന ആവര്ത്തിച്ച് നല്കുകയും ചെയ്തു. യൂറോപ്യന് യൂണിയനില് നിന്നുള്ള വികസന ഫണ്ടുകളുടെ ഭൂരിഭാഗവും രാഷ്ട്രീയ പിന്തുണക്കാരിലേക്ക് മാത്രം എത്തുന്നുണ്ടെന്ന് ഉറപ്പാക്കി. വോട്ടര്മാര്ക്ക് അത് അറിയാമായിരുന്നു. പിന്നീട് സംഭരണത്തിന്റെയും അഴിമതിയുടെയും വ്യവസ്ഥാപരമായ പ്രശ്നങ്ങള് ചൂണ്ടി 2022 ല് ഇയു ഹംഗറിയിലേക്കുള്ള ഫണ്ടുകള് മരവിപ്പിക്കാന് തുടങ്ങിയപ്പോള് അവര്ക്കത് അനുഭവപ്പെട്ടു. അതുകൊണ്ടാണ് അഴിമതിയില് നിന്ന് പൂര്ണമായ മോചനം വാഗ്ദാനം ചെയ്ത പീറ്റര് മാഗ്യാര് മികച്ച നിലയില് വിജയം കൊയ്തത്. ട്രംപിനെ മാത്രമല്ല പലരെയും ഓര്ബന് പ്രചോദിപ്പിച്ചു. കണ്സര്വേറ്റീവ് ഹെറിറ്റേജ് ഫൗണ്ടേഷന് തയ്യാറാക്കിയ യുഎസ് ഗവണ്മെന്റിനെ സമൂലമായി പുനഃക്രമീകരിക്കുന്നതിനുള്ള ബ്ലൂപ്രിന്റ് പ്രോജക്റ്റ് 2025-ല് ഹംഗേറിയന് നേതാവിന്റെ ഭരണ മാതൃക നേരിട്ട് സ്വാധീനിക്കുകയുമുണ്ടായി. സ്വതന്ത്ര ഗവണ്മെന്റ് ഏജന്സികളുടെ നേരിട്ടുള്ള നിയന്ത്രണം ഏറ്റെടുക്കുന്നതുള്പ്പെടെ ട്രംപ് അതിന്റെ പല ആശയങ്ങളും പിന്തുടര്ന്നു.
ഇറാനുമായുള്ള യുദ്ധത്തില് കാലിടറുന്ന ട്രംപിന് അത് മറ്റൊരു പ്രഹരമായി. അദ്ദേഹത്തെയും നരേന്ദ്ര മോദിയെയും പോലെ ഓര്ബന് ജുഡീഷ്യറിയും മാധ്യമങ്ങളും ഉള്പ്പെടെ ഭരണഘടനാ സ്ഥാപനങ്ങളെ ദുര്ബലപ്പെടുത്തി വരികയായിരുന്നു. ‘അമിതാധികാര ജനാധിപത്യം’ തകര്ന്നത് ആഗോളതലത്തിലെ വലതുപക്ഷ ശക്തികള്ക്ക് വലിയ പാഠമാണ് നല്കുന്നത്. ട്രാന്സ്പരന്സി ഇന്റര്നാഷണലിന്റെ ഏറ്റവും പുതിയ കണക്കനുസരിച്ച് 27 രാജ്യങ്ങളുള്ള യൂറോപ്യന് യൂണിയനിലെ ഏറ്റവും അഴിമതി നിറഞ്ഞതായി ഹംഗറി (ബള്ഗേറിയയ്ക്കൊപ്പം) മാറിയെന്ന വിമര്ശനം മാഗ്യാര് ആയുധമാക്കി. അദ്ദേഹം അധികാരത്തിലെത്തിയാല് രാജ്യം യുദ്ധത്തിലേക്ക് വലിച്ചിഴക്കപ്പെടുമെന്ന പ്രചാരണങ്ങള് മറികടന്നാണ് ചെറുപ്പക്കാര് ഉള്പ്പെട്ട വോട്ടര്മാര് പ്രതിപക്ഷത്തെ പിന്തുണച്ചത്. ശീതയുദ്ധാനന്തരം വിദേശ നിക്ഷേപകരുടെ പറുദീസയായിരുന്ന ഹംഗറി ഇപ്പോള് യൂറോപ്യന് യൂണിയനിലെ ഏറ്റവും ദരിദ്ര രാജ്യങ്ങളിലൊന്നാണ്. 2025ലെ സാമ്പത്തിക വളര്ച്ച വെറും 0.4 ശതമാനം. തൊഴിലില്ലായ്മ 10 വര്ഷത്തെ ഏറ്റവും ഉയര്ന്ന നിലയിലും. ഇന്ന് യൂറോപ്പ് വിജയിക്കുന്നു, യൂറോപ്യന് മൂല്യങ്ങള് വിജയിക്കുന്നുവെന്നാണ് സ്പാനിഷ് പ്രധാനമന്ത്രി പെഡ്രോ സാഞ്ചസ് എക്സില് പോസ്റ്റ് ചെയ്തത്. പോളിഷ് പ്രധാനമന്ത്രി ഡൊണാള്ഡ് ടസ്ക് സമൂഹ മാധ്യമങ്ങളില് വിളിച്ചു പറഞ്ഞതാകട്ടെ തിരിച്ചുവരൂ! പ്രിയ സുഹൃത്തുക്കളേ മഹത്തായ വിജയമെന്നും.
No Comments yet!